Gerella Vrolijk a bay un conferencia sin sa practicamente su contenido te ora cu e tabata sinta den e sala. Esaki tabata na aña 2021, unda el a scucha cu atencion con por obtene rikesa. E tabata den un sala hunto cu self-made millionaires, cu a bin for di exterior pa atende un ‘Wealth Conference’ na Aruba. Algo a shift den dje desde e momento ey y el a sinti pa prome biaha cu e tabata den alineamento perfecto cu e proposito di su bida. Gerella a lansa su prome negoshi tempo e tabatin 20 aña y tin dos decada trahado den e mercado comercial na Aruba.
Gerella ademas di su negoshi, a traha 6 aña na Aruba Tourism Authority, unda el a gana experiencia profesional amplio di e producto di Aruba y kico tur e destinacion di Aruba tin di ofrece. A.T.A a polish su corporate & leadership mindset y con pa traha cu diferente partners y stakeholders local y internacional. Despues di ATA, el a drenta e mundo di real estate cual tabata un deseo di hopi aña pa traha den e industria aki. Principalmente pa yuda e localnan yega na nan propiedad. “Esaki ta un industria cu ta move hopi lihe y tin risico halto envolvi. Bo mester ta un persona integro cu tin backbone y caracter. Pa bo prospera den e industria aki bo man y bo curason mester ta limpi”.
Gerella ta defini su mes como un persona hopi alegre, optimista, resiliente, independiente, cu un personalidad extrovert. E ta move hopi a base di su instinto, su bos interno y su FE y Amor pa Dios, cu ta su compass di bida. E tin un estilo di bida hopi dinamico y alabes trankil. E por move di un proyecto di negoshi pa un otro of un deal di ‘real estate’ pa un ordo di catering hopi lihe. E ta gusta construi relacion y haci negoshi a base di su conocemento, experticio y experiencia. Gerella gusta tambe cultiva su paz interno y externo. P’e su hogar semper mester ta na ordo y ta un santuario di paz.
Un di su satisfaccionnan mas grandi ta cu e por a logra traha su cas durante un pandemia y di por disfruta di su logronan cu el a traha hopi duro p’e. Den Focus Digital Magazine di maart, Gerella Vrolijk ta conta cua ta un di e lesnan mas grandi cu el a siña di dje. E revista ta accesibel gratis via Apple Store, Android Google Play Store y www.focus.aw (Menu Tab FOCUS DIGITAL)
