E IMPORTANCIA PA PRESERVA NOS HERENCIA CULINARIO

Su experiencia ta abarca diplomacia culinario, consehero di gobierno y un interes emergente den e poder di sanacion spiritual di cuminda Afro-Caribense. Gerald “Gino” Kock PhD ta Culinary Ambassador pa World Food Travel Association (WFTA) y ta dirigi programanan di educacion y apprenticeship na Aruba y como Dean of Student Affairs na e colegio comunitario local. E tabatin e oportunidad di por a mira cu su propio wowonan con e tradicionnan di cuminda, creatividad y conocemento local por fortalece comunidadnan y crea oportunidadnan real. Gino ta fascina cu e cultura di cuminda Caribense, resiliencia di comunidad y contamento di historia visual.

Desde maart Gino ta forma parti di e team di e plataforma di Focus cu un segmento mensual, cu ta cuminsa cu un idea simpel: cu loke nos ta come no ta solamente e parti di alimento, sino un cu tin di haber cu nos herencia. Na Aruba nos sa papia hopi biaha di cuminda como smaak, celebracion of hospitalidad. Pero den cada plato tin algo hopi mas profundo, cu ta nos herencia of recuerdo con antes nos grandinan tabata come. Cuminda ta carga rastronan di esunnan cu a bini prome cu nos, no solamente den e recetanan sino den gesto, custumber y storianan di famia cu no a wordo conta y casi completamente lubida.

Gino Kock ta elabora ampliamente riba shete diferente aspecto di e Cushina Caribense, cu semper a wordo forma pa movimento: migracion, comercio, adaptacion y resiliencia. E antropologo, Sidney Mintz, a skirbi extensamente tocante con cuminda den e region aki ta refleha historianan di sobrevivencia y creatividad. Cada plato ta conta di biahenan a traves di oceano y generacionnan, reconstruyendo bida cu loke tabata disponibel. Na Aruba, recetanan a biaha den seno di famia hopi prome cu nan a aparece den restaurantnan of bukinan di cushina. Nan ta keda conexionnan bibo cu nos antepasadonan.

E cumindanan cu a forma nos cultura di Aruba

Un persona kisas no semper por papia cu facilidad tocante su tata, su welo of su famianan di antes. Pero un cos cu si hopi biaha e ta corda ta, kico nan tabata come. Koffie trempan mainta prome cu solo sali, sopi despues di dianan largo di trabou, platonan improvisa pa por a alimenta famianan of hopi di nan amigonan di cas ora tabatin tiki cuminda pa tur. E recuerdonan aki casi nunca a y ta wordo skirbi, pero toch di un manera of otro, nan ta keda bibo memey di nos. Cuminda, e ora ta bira un archivo di experiencia di famia, cargando storianan di esfuerso, sacrificio y un orguyo entre nos hendenan.

E lenguahe keto di e mesa di famia

Na hopi mesa di nos famianan di antes, reglanan di comportacion tabata existi sin cu nan mester a wordo menciona. Ken tabata wordo sirbi prome? Ken tur mester a warda? Ken tabata percura pa tur otro hende tin suficiente. E muchanan tabata siña respet y disciplina, no pa medio di discurso, sino via ritualnan diario rond di e cuminda. Den generacionnan anterior, specialmente e hombernan a wordo siña perseverancia y gratitud pa medio di e practicanan chikito aki: termina loke wordo sirbi, no malgasta nada y aprecia loke wordo duna. E gestonan aki silenciosamente ta forma caracter y un sentido di pertenencia y specialmente na islanan chikito manera Aruba.

Gerald “Gino” Kock ta elabora tambe tocante “scarsedad, abundancia y recuerdo” – “cuminda como expresion cultural” – “recorda pa medio di smaak”, e historia cu ta wordo pasa silenciosamente di un generacion pa e siguiente. E ta recuerdo expresa sin palabra. E revista ta accesibel gratis via Apple Store, Android Google Play Store y www.focus.aw (Menu Tab FOCUS DIGITAL)