Representa Bonaire na Miss Universe tabata un di e soñonan di Ruby Pouchet na 2024. E aña aki un momento cu e ta describi manera un soño ta ora cu Dito Diaz a bay na rudia pa puntr’e pa bira su esposa. Ruby a keda sin palabra y no por a kere cu e momento tabata di berdad. Tin ora e kier bay bek na e momento pa ripiti cada detaye di nobo cu Dito a pensa riba dje. E famia presente, sunset, boto, rosanan y cu bista di su beach faborito. E ta e compromiso cu Ruby lo a describi precies mescos si a puntre algun aña pasa… perfecto y romantico.
Ruby y Dito a conoce otro for di mucha bibando den e mesun bario y tabata amigo. Tur e muchanan di e bario tabata reuni despues di scol y nan tabata hunga, landa, core baiskel of cualkier otro actividad leuk. Den nan añanan di adolescencia nan a cuminsa sinti algo special pa otro, mas cu solamente un amistad. Pero poco tempo despues Ruby a bay biba na Merca. Nan a keda den contacto un tempo, pero despues cada uno a sigui nan caminda. Hopi aña despues, Ruby y Dito a bolbe topa y nan a fall in love.
Ambos ta hopi activo como profesionalnan den nan area di trabou na Boneiro. Dito Diaz tin su propio empresa di excavacion y desaroyo di sitio pa proyectonan di construccion. Ruby Pouchet ta traha como specialista di comunicacion pa gobierno di Boneiro. E ta haci tambe modelahe y ta traha contenido pa su rednan social. Den Focus Digital Magazine di juni, e pareha ta comparti nan plannan pa futuro y ta sigur cu nan enlace matrimonial lo bira un fiesta yen di ambiente. E revista ta accesibel gratis via Apple Store, Android Google Play Store y www.focus.aw (Menu Tab FOCUS DIGITAL)
