E luna aki den su segmento di “Receta”, Elena Meza ta amplia un tiki mas riba su conocemento di su cushina, pero tambe di su curason y pasion na e audiencia di e plataforma di Focus Digital Magazine. Su caminda den e mundo di hariña y forno a cuminsa 10 aña pasa, formando su profesion na SENA Colombia. Desde su dianan como asistente, pero tambe prome cu el a bira un pastry chef di un restaurant reconoci na Bogota, su meta diario tabata pa crea momentonan bunita entre su clientenan.
Sinembargo, bida a pone un alerta riba su caminda cu a cambia su vision pa semper: un di su yiunan a desaroya un fuerte reaccion alergico riba sucu y colornan artificial. E susto di un mama a transforma den un motor di buskeda pa yega na un solucion pa esaki. Un curiosidad inparabel a yen’e: Con e por substitui of minimalisa sin cu un plato dushi ta perde su sabor y encanto. E contesta na e pregunta ey ta loke awe e ta comparti cu boso, pasobra cuida nos famia ta e receta mas importante cu nos por siña.
E producto Sucu: E ta un amigo dushi of un enemigo silencioso?
Despues di e exito cu nos “Banana Bread”, e kier pa nos papia over di algo cu ta toca nos tur: e famoso sucu. Como un mama y profesional cu ta opta pa un bida saludabel, Elena su meta no ta pa prohibi, sino pa nos siña eligi cu consenshi. Boso tabata sa cu Organisacion Mundial di Salud (OMS) ta recomenda pa e consumo di sucu diario no supera 5% of 10% di nos consumo di caloria diario? Traduci den e lenguage di nos cushina: esey ta apenas un 6 telep pa dia pa un adulto! Hopi biaha nos ta consumi esey den un solo refresco of un koffie procesa sin ta consciente di esey.
Esaki ta importante pa nos mes pero tambe pa nos yiunan y e siguiente generacionnan. Na Aruba, nos mesanan semper ta generoso, pero awe nos sa cu e exceso di sucu ta scondi tras di hopi enfermedad cu nos no ta na altura di dje. Como ser humano consciente, nos tin e poder di cambia e legado di cuminda di e generacionnan nobo. E meta ta pa siña nan saborea tur loke ta natural y esey lo ta e miho regalo cu nos por duna nan!
E arte di sustitui (Sin perde sabor)
E bon noticia ta cu e naturalesa ta hopi generoso y ta ofrece hopi alternativa pa ingredientenan procesa. Pa demostra boso cu e reposteria consciente ta dushi y facil, Elena Meza ta comparti un receta cu el a bin ta experimentando pa basta tempo. E ta un ‘Bolo di Appel’, caminda e fruta ta fresco, puro y yen di sabor. Prepara e materialnan cu boso ta haya den e revista, cu ta accesibel gratis via Apple Store, Android Google Play Store y www.focus.aw (Menu Tab FOCUS DIGITAL)
Bo tin un receta di famia cu bo kier transforma den su version saludabel? Bo por haci esey door di comparti esaki cu Elena via bo cuenta di social media of tag su pagina di instragram @helenameza.esencial riba esun di bo. Bo por cont’e pakico e ta special pa bo y e lo experimenta con pa substitui nan cu ingredientenan mas saludabel. Despues e por comparti esaki cu nos comunidad. Sigui su Instagram @Elena Meza
