Tin un diferencia enorme entre mustra interes y core tras di atencion. Ora bo ta over-text, trata di agrada tur ora, cambia bo mes pa otro hende gusta bo, of constantemente trata di prueba cu bo ta “suficiente”, bo no ta simplemente buscando amor. Tin biaha bo ta buscando siguridad.
Y esaki por tin relacion cu loke ta wordo yama anxious attachment: ora distancia, silencio of incertidumbre ta activa un miedo di perde conexion. E resultado? Bo por cuminsa haci mas precisamente ora bo mester haci menos.
Stop di persigui… Cuminsa scoge!
Bo a manda e mensahe.
Cinco minuut pasa.
Bo ta wak bo telefon.
Dies minuut.
Nada.
Bo ta manda un otro: “Tur cos ta bon?”
Despues un emoji.
Despues bo ta cuminsa pensa: Kico mi a bisa robes? Pakico e no ta contesta? Talbes mi mester haci algo pa mantene su interes…
E conseho cu Dina Alexander ta comparti den edicion di Focus Digital Magazine di september ta cu mester STOP cu esaki. Desea conexion no ta e problema. Perde bo mes persiguiendo conexion, si por bira e problema.
Mas mensahe.
Mas splicacion.
Mas disponibilidad.
Mas esfuerso.
Mas prueba di bo balor.
Pero atraccion no ta florece bou di presion.
Bo no mester convence ningun hende pa desea bo.
People pleasing por parce cariño, pero tin biaha e ta miedo bisti den un shimis bunita.
Bo ta bisa “si” ora bo kier bisa “no”.
Bo ta acepta sobra pasobra bo tin miedo di perde e persona.
Bo ta haci bo mes mas facil, mas disponibel, menos exigente.
Y pocopoco bo ta bandona bo propio necesidadnan pa evita cu otro hende bandona bo.
Esey no ta intimidad… Intimidad ta permiti dos persona acerca otro sin cu un di nan mester desaparece. Pues, con bo ta cambia e dinamica? E contestanan ta den e revista di e luna aki cu ta accesibel gratis via Apple Store, Android Google Play Store y www.focus.aw (Menu Tab FOCUS DIGITAL)
